Frá árinu 2006 hefur Þekkingarnet Austurlands (ÞNA) haft það hlutverk að stuðla að og styðja við uppbyggingu rannsóknastarfs á Austurlandi.  Einn liður í þeirri viðleitni er verkefnið Rannsóknatorg Austurlands sem er kynnt á þessum vef.

Markmið verkefnisins er að:

• Mynda tengslanet aðila er stunda rannsóknir á Austurlandi (hvort sem þeir starfa innan rannsóknastofnana, menningarstofnana eða á eigin vegum.
• Byggja upp og viðhalda upplýsingum um sérfræðiþekkingu, rannsóknaverkefni og aðstöðu á svæðinu.
• Kynna og markaðssetja þekkingu á svæðinu bæði gagnvart íbúum sem og háskólanemum sem gætu t.d. haft áhuga á að vinna lokaverkefni á svæðinu.
• Stuðla að áframhaldandi þróun og uppbyggingu rannsóknabókasafns fyrir svæðið.
• Vinna að fjármögnun rannsókna á Austurlandi.

Hjá Þekkingarnetinu hefur verið unnið að Rannsóknabókasafni Austurlands og samantekt um rannsóknaverkefni á Austurlandi frá því snemma árs 2007.  Auk þess hafa möguleikar á stofnun Rannsóknasjóðs Austurlands verið skoðaðir.  Rannsóknatorgsverkefnið varð til í framhaldi af þessari vinnu og byggir á henni.

Það sem áætlað er að gera í tengslum við Rannsóknatorg Austurlands er:

• Byggja upp og viðhalda gagnagrunni um helstu sérfræðinga á Austurlandi og sérfræðinga utan svæðisins sem búa yfir rannsóknareynslu og þekkingu á viðfangsefnum tengdum Austurlandi.  Þessi gagnagrunnur verður tengdur við upplýsingar um helstu rannsóknaverkefni og hugmyndir að verkefnum.  Hann verður aðgengilegur á vefsíðu rannsóknatorgsins.  Unnið í samstarfi við sérfræðinga og með þeirra vilja.
• Rannsóknastarf á Austurlandi.  Upplýsingar um rannsóknaverkefni sem verið er að vinna á svæðinu.  Stutt lýsing og hlekkur á frekari upplýsingar eða tengilið.
• Rannsóknaaðstaða.  Upplýsingar um rannsóknaaðstöðu t.d. sérbúnar rannsóknastofur og skrifstofuaðstöðu í þekkingarsetrum og möguleika á dvalaraðstöður fyrir gestavísindamenn.
• Rannsóknatækifæri á Austurlandi verða kynnt t.d. á háskólakynningum, á íbúafundum/opnum húsum, á vefsíðu o.fl.
• Rannsóknabókasafn Austurlands.  Haldið verður áfram að skrá helstu sérfræðirit og vísindagreinar í þekkingarstofnunum á Austurlandi.  þessi vinna yrði aðgengileg á rannsóknatorginu sem og á landsvísu gegnum landskerfi bókasafna.  Mikilvægt er að kynna þessa vinnu vel gagnvart rannsakendum og rannsóknanemendum.
• Rannsóknasjóður Austurlands.  Unnið hefur verið að hugmyndum um stofnun slíks sjóðs.  Upplýsingar um sjóðinn aðra sjóði sem og önnur fjármögnunartækifæri fyrir rannsóknastarf á Austurlandi verða gerðar aðgengilegar á vefsíðu rannsóknatorgsins.

Einnig leitast Þekkingarnet Austurlands við að styðja við uppbyggingu og samstarf þekkingarsetra á Austurlandi og á vegum þess eru haldin rannsóknaþing Austurlands þar sem fræðimenn og áhugamenn koma saman, kynna rannsóknir og ráða ráðum sínum.

Sumarið 2008 hittust fulltrúar Þekkingarnets Austurlands og Austurnets til að ræða möguleika á að koma á fót vefsíðu Rannsóknatorgs Þekkingarnets Austurlands, með það að markmiði að gera sem flestar rannsóknir og hugmyndir að rannsóknarverkefnum á Austurlandi sýnilegar á einum stað.  Ákveðið var að ganga út frá sjónarhorni fræðimanna, enda þeir sá hópur sem yrði virkastur á þessu torgi.  Unnið var minnisblað eftir fund aðila og það samþykkt sem grunnur að hönnunarlýsingunni sem hér fer á eftir.